راولپنڈی ۔5دسمبر (اے پی پی) فارمیشن کمانڈر کانفرنس دی اعلی سطحی وفود دے تحفظ کیتے پاک فوج دی تعیناتی تے کیتے ڳئے بدنیتی دے پروپیگنڈے تے تشویش کریندیں ہوئیں قومی سلامتی ، انسداد دہشت گردی دی حکمت عملی ،دشمن قوتاں دے ناپاک عزائم کوں ناکام ٻݨاوݨ، داخلی اتے خارجی خطریاں نال نبڑݨ دی تیاریاں، سماجی تے اقتصادی ترقی کیتے آپݨا کردار جاری رکھݨ دا عزم کیتا۔ آئی ایس پی آر موجب آرمی چیف جنرل سید عاصم منیردی صدرات خمیس کوں جی ایچ کیو اچ ݙو روزہ 84ویں فارمیشن کمانڈرز کانفرنس تھئی جئیں اچ کور کمانڈرز، پرنسپل سٹاف آفیسرز اتے پاک فوج دے سارے فارمیشن کمانڈرز شریک تھیے۔ فورم دا آغاز مسلح افواج، قانون نافذ کرݨ آلے ادارے اتے ملک دی سلامتی اتے خودمخاری کیتے آپݨی جاناں دا نذرانہ ݙیوݨ آلے پاکستان دے شہریاں، بشمول قانون نافذ کرݨ آلے اداریاں دے او اہلکار جنہاں اڄوکے پرتشدد مظاہریاں اچ شہادتاں قبول کیتی، کوں فاتحہ خوانی اتے خراج عقیدت پیش کرݨ نال تھیا۔ فورم بھارت دے قبضے اچ مقبوضہ کشمیر اچ جاری انسانی حقوق دی خلاف ورزیاں دی مذمت کیتی اتے کشمیری عوام کیتے پاکستان دی غیر متزلزل سیاسی، سفارتی اتے اخلاقی حمایت کیتی۔ فورم فلسطینی عوام نال یکجہتی کریندیں ہوئیں غزہ اچ ظلم دی شدید مذمت کیتی اتے فوجی جارحیت دے خاتمے کیتے بین الاقوامی قانونی اقدامات دی حمایت کیتی۔ شرکاء کوں ٻاہرلی اتے اندرونی ݙوہیں طرح دے سکیورٹی دے اڄوکے ماحول بارےبریفنگ ݙتی ڳئی اتے رویتی اتے غیر روایتی خطریاں نال نبڑݨ کیتے فوج دی آپریشنل تیاریاں دا جائزہ ڳھدا۔ فورم انسداد دہشت گردی دی جاری کارروائیاں دا ہک جامع تجزیہ کیتا اتے بی ایل اے مجید بریگیڈ سودھے بلوچستان دے اندر سرگرم دہشت گرداں دے خلاف کاروائیاں تےتوجہ ݙیندیں ہوعیں پاکستان کوں غیر مستحکم کرݨ کیتے دشمن قوتاں دی ایماء اتے کم کرݨ آلے دہشت گرداں، انہاں دے سہولت کاراں اتے انہاں دی حوصلہ افزائی کرݨ آلیاں کوں بے اثر کرݨ دا عزم کیتا۔ فورم اہم سرکاری عمارتاں کوں محفوظ ٻݨاوݨ اتے قابل قدر دورہ کرݨ آلے وفود کوں محفوظ ماحول ݙیوݨ کیتے دارالحکومت اچ فوج دی قانونی تعیناتی تے کیتے ڳئے بدنیتی تے مبنی پروپیگنڈے تے تشویش کیتی۔ اے پہلے توں منصوبہ اتے پہلے توں طے تھیا پروپیگنڈہ کڄھ سیاسی عناصر ولوں پاکستان دی عوام اتے مسلح فوج اتے اداریاں وچال دراڑ پاوݨ دی کوشش کوں نشابر کریندے۔ اے فضول کوشش جو ٻاہرلے کھݙاریاں دی مدد اتے حوصلہ افزائی کیتی ڳئی اے، کݙاہیں کامیاب نہ تھیسی۔ فورم زور ݙتا جو اے ضروری اے جو حکومت پروپیگنڈہ کرݨ آلے، کوڑ الاوݨ آلے اتے پولرائزیشن دے ٻج پاوݨ کیتے اظہار رائے دی آزادی دے بے لاگ اتے غیر اخلاقی استعمال کوں روکݨ کیتے سخت قوانین اتے ضوابط کوں نافذ کرے اتے انہاں تے عمل کرے۔ فورم عزم کیتا جو فوج قوم اتے عوام دی خدمت کیتے پرعزم اے۔ دہشت گرداں ولوں پاکستان دے خلاف افغان سرزمین دے بے دریغ استعمال کوں وی تشویش نال نوٹ کیتا ڳئے۔ فورم زور ݙتا جو ݙوہیں پڑوسی اسلامی ملکاں دے فیدے اچ اے جو او آپسی طور فیدہ مند رابطے تے توجہ ݙیون اتے ہمسایہ ملک آپݨی سرزمین کوں پاکستان دے خلاف استعمال تھیوݨ توں روکے۔ فورم عزم کیتا جو خیبرپختونخوا اتے بلوچستان اچ وفاقی اتے صوبائی حکومتاں ولوں شروع کیتی ڳئی سارے سماجی تے اقتصادی ترقیاتی کوششاں دی حمایت جاری رکھسیوں۔ سماجی اقتصادی ترقی کیتے فوج دے عزم کوں اجاگر کریندیں ہوئیں فورم اقتصادی ترقی ودھاوݨ، غیر قانونی سپیکٹرم دے خلاف کریک ڈاؤن اتے دہشت گردی اتے جرائم دے ڳٹھ جوڑ کوں ختم کرݨ اچ حکومتی کوششاں دی حمایت جاری رکھݨ دا عزم کیتا۔ کانفرنس دے چھیکڑ تے آرمی چیف پیشہ ورانہ مہارت، آپریشنل تیاری اتے پاکستان دی سلامتی اتے استحکام کوں یقینی ٻݨاوݨ کیتے فوج دی لگن دی اہمیت تے زور ݙتا۔
.jpg)
.jpg)
