اسلام آباد۔13اگست(اے پی پی)وفاقی وزیر اطلاعات، نشریات، قومی ورثہ و ثقافت عطاء اللہ تارڑ آکھیے جو پاکستان دے در ڄڳ کیتے کھلیندے پئے ہیں، 126 ملکاں دے سیاحواں کیتے ویزا فیس ختم کرݙتی اے، ای ویزا پالیسی متعارف کرائی اے ڄیڑھی اڄ رات توں نافذ تھی ویسی۔ اسلام آباد اچ پریس کانفرنس کریندے انہاں آکھیا جو پیرس اولمپکس اچ پاکستان کوں گولڈ میڈل اعزاز ملیے جیندے تے پورا ملک جشن منیندا پئے، ہر پاسو چنڳیاں خبراں آندیاں پن، ارشد ندیم دا وطن ولݨ تے شاندار استقبال کیتا ڳئے، ارشد ندیم اولمپکس ونڄݨ توں پہلے وی وزیراعظم شہباز شریف نال ملیے ہن، اتنے عرصے بعد گولڈ میڈل جیتݨ خوشی دی ڳالھ اے، جشن آزادی تے اے خوشی ٻئی ودھ ڳئی اے، اڄ وزیر اعلیٰ پنجاب میانچنوں ونڄ تے ارشد ندیم نال ملین، ساݙی پچھلی حکومت دا ڈیپارٹمنٹل سپورٹس دی بحالی چنڳاں اقدام ہا جیندے چنڳے نتیجے آندے پن۔ وفاقی وزیر آکھیا جو ارشد ندیم پاکستان دا جھنڈا پیرس اچ اچا کیتے جتھاں پاکستان دا ترانہ وڄایا ڳئے، اولپکس اچ ریکارڈ تروڑݨ ارشد ندیم دی وݙی کامیابی اے، ارشد ندیم دی نویکلی کہانی لکھاں نینگراں کیتے مثال اے جیندے تے ہک ” ہک شارٹ ٹیلی فلم ” ٻݨݨی چاہیدی اے جو انہاں دی کیا جدوجہد اے، ایں کامیابی تے اپݨے ھیرو کوں مبارک ݙیندے ہیں، وفاقی وزیر اطلاعات آکھیا جو ویزا عمل کوں سوکھا کرݙتا ڳئے، اڄ توں ایندے تے عمل تھیندا پئے اتے 126 ممالک دے شہریاں کیتے ہک سادہ فارم متعارف کرایا گئے جیندے نال 10 منٹ اچ ای ویزا جاری کر ݙتا ویسی ڄیڑھا 90 ݙینھ کیتے کارآمد ہوسی اتے ایندی تجدید وی تھی سڳسی، انہاں 126 ممالک کیتے ویزا فیس کائنا ہوسی جو لوک آون اتے اتھاں سیاحت کوں ترقی ملے، این سانڳے سیاحوان دی سیکیورٹی کیتے خصوصی اقدامات کیتے ڳن۔ وفاقی وزیر آکھیا جو خلیجی ملکاں کیتے وی آن آرائیول ویزا ݙتا ویسی۔ انہاں آکھیا جو یوم آزادی شایان شان منایا ویسی اتے پورے ملک اچ تقریباں تھیسن۔
.jpg)
.jpg)
