اسلام آباد۔11جنوری(اے پی پی) وزیراعظم محمد شہباز شریف ریزیلیئنٹ پاکستان کانفرنس کوں ٻہوں کامیاب قرار ݙیندے ہوئیں آکھے جو اساں رل تے دنیا دے سامݨے سیلاب متاثرین تے پاکستان دا مقدمہ لڑیے، عالمی برادری وی اساں تے بھرپوراعتماد کیتے، قوم دیاں دعاواں تے ساݙے اخلاص دے نتیجہ اچ اللہ تعالیٰ اساکوں سرخرو کیتے، ہݨ اساکوں عوام دی ترقی، خوشحالی تے سیلاب متاثرین دی بحالی اتے نویں سروں تمیر کیتے اتحاد اتے یکجہتی نال کم کریندے ہوئیں عوام دے سامݨے سروخرو تھیوݨا اے ، دوست ملکاں تے عالمی برادری توں ملݨ آلی امداد دی ھک ھک پائی شفافیت نال خرچ کیتی ویسی تے آپݨی زراعت، صنعت اتے انفراسٹرکچر کوں بحال کریسوں ۔ اے ڳالھیں انہاں ٻدھ کوں اتھاں پریس کانفرنس توں خطاب کریندے ہوئیں آکھئن۔ ایں موقع تے وفاقی وزیر خزانہ اسحق ڈار، وزیر خارجہ بلاول بھٹو زرداری، وزیر ماحولیاتی تبدیلی شیری رحمن، وزیر مواصلات مولانا اسعد محمود، وزیر قومی غذائی تحفظ و تحقیق طارق بشیر چیمہ اتے اے این پی دے رہنما میاں افتخار حسین وی موجود ہن ۔ وزیراعظم شہباز شریف آکھیے جنیوا کانفرنس ٻہوں کامیاب ثابت تھئی اے ، اے کروڑاں عوام دیاں دعائیں تے ایندے اخلاص تے محنت دا نتیجہ اے جیں دا مظاہرہ اتحادی حکومت سیلاب متاثرین سانڳے کیتے ۔ وزیراعظم آکھیے سارے متاثرین دی بحالی اتے ول آباد کاری تئیں حکومت آرام نال نہ ٻہسی ۔ انہاں ݙسائے جنیوا کانفرنس اچ دوست ملک اتے عالمی برادری مجموعی طور تے 9.7 ارب ڈالر دے وعدے کیتن ، ساریں توں وݙی امداد دا اعلان اسلامک ڈویلپمنٹ بینک 4.2 ارب ڈالر دا کیتے ، ایں توں انڄ ورلڈ بینک 2 ارب ڈالر، ایشین انفراسٹرکچر ڈویلپمنٹ بینک جیں دا ہیڈ آفس چین وچ اے ھک ارب ڈالر، ایشیائی ترقیاتی بینک 500 ملین ڈالر، آذربائیجان 2 ملین ڈالر، کینیڈا 18.6 ملین ڈالر، چین 100 ملین ڈالر، ڈنمارک 3.8 ملین ڈالر، یورپین یونین 87 ملین یوروز، فرانس 380 ملین یورو، جرمنی 84 ملین یورو، اٹلی 23 ملین یوروز، جاپان 77 ملین ڈالرز، نیدر لینڈ ساڈھے ترائے ملین یوروز، ناروے 6.5 ملین یوروز، قطر 25 ملین ڈالرز، سعودی عرب ھک ارب ڈالر، سویڈن 7.5 ملین ڈالر، برطانیہ 36 ملین پائونڈز اتے امریکہ بذریعہ یو ایس ایڈ 100 ملین ڈالر دا اعلان کیتے ۔ وزیراعظم آکھیے جنیوا کانفرنس اچ اقوام عالم پاکستان دی حکومت اتے عوام تے بھرپور اعتماد کیتے ،جے انہاں کوں خدانخواستہ ݙر ہوندا تاں اے رقم شفاف طریقے نال خرچ نہ تھیسی تاں اتنی وݙی امداد دے اعلانات نہ تھیندے ۔ وزیراعظم آکھیے بدقسمتی نال ساݙے سیاسی مخالفین بدترین پروپیگنڈا کیتا لیکن عالمی برادری ایں تے کن نی ݙتے اپݨے ٹیکس پیئرز دا پیسہ پاکستان کیتے ݙتا ، اے پاکستان دی ٻہوں وݙی کامیابی اے، جیں تے پاکستان دے عوام اتے اتحادی حکومت دے رہنما مبارخ دے مستحق ہن ۔ وزیراعظم جنیوا کانفرنس دی کامیابی کیتے بھرپور کردار ادا کرݨ تے وزیر خارجہ بلاول بھٹو زرداری، وزیر خزانہ اسحق ڈار، وزیر ماحولیاتی تبدیلی شیری رحمن، وزیر منصوبہ بندی و ترقی احسن اقبال، اقتصادی امور دے وزیر ایاز صادق، وفاقی وزیر اطلاعات و نشریات مریم اورنگزیب، وزیر مملکت خارجہ حنا ربانی کھر دے علاوہ سیکرٹری خارجہ، ٻاہرلے ملک پاکستانی سفارتخانیں تے مشنز دے حکام اتے اتحادی حکومت دے رہنماواں دا شکریہ ادا کیتے۔ انہاں آکھیے اساکوں ھک ھک پائی کوں آپݨے عوام دی ترقی تے خوشحالی کیتے شفافیت نال استعمال کرݨی اے ، ھک ھک پائی سیلاب متاثرین دی خدمت، انہاں دی بحالی اتے نویں سروں تعمیر کیتے خرچ کیتی ویسی ۔ وزیراعظم نے ایں امر تے افسوس دا اظہار کیتے جو قوم اچ تقسیم در تقسیم دا زہر گھول ݙتا ڳئے تے ساݙی سیاسی تاریخ تے ٻہوں وݙا دھٻہ اے، ایں دے باوجود وفاق اتے سارے صوبیں رل تے جنیوا کانفرنس اچ دنیا کوں اتحاد و یکجہتی دا پیغام ݙتا تے ایں کانفرنس اچ سارے صوبیں دی نمائندگی موجود ہئی، ساریں رل تے پاکستان دا مقدمہ لڑیا تے پوری دنیا ساݙی حکومت تے بھرپور اعتماد کیتے ، ہݨ اے اساں تے ہے جو کیوں ارباں ڈالر کوں ݙینھ رات محنت نال سبھے توانائیاں استعمال کریندے ہوئیں اپݨے سیلاب متاثرہ عوام اتے صنعت، زراعت، انفراسٹرکچر دی بحالی و ترقی اتےنویں سروں تعمیر کیتے خرچ کروں تے اینکوں آپݨی کامیابی دے بے مثال نمونے دے طور تے پیش کرون۔ وزیراعظم سعودی عرب، قطر، یو اے ای، ترکی، چین، امریکہ، فرانس، برطانیہ، کینیڈا، یورپی یونین، اسلامک ڈویلپمنٹ بینک، ایشیائی ترقیاتی بینک، ایشین انفراسٹرکچر ڈویلپمنٹ بینک اتے ورلڈ بینک سودھے سارے دوست ملکاں تے عالمی اداریں اتے بین الاقوامی برادری دا شکریہ ادا کیتے جنہاں دل کھول تے پاکستان دی مدد کیتی۔ انہاں آکھیے اللہ تعالیٰ اساں تے ٻہوں فضل و کرم کیتے اساکوں اندازیں تے توقعات توں ودھ کامیابی ݙتی۔ وزیراعظم آکھیے جیویں سیلاب دے بعد افواج پاکستان، سارے وفاقی و صوبائی اداریں رل تے متاثرین دی مدد تے بحالی کیتے کم کیتے ایویں اسں اتحاد و یکجہتی نال کوشش جاری رکھیسوں تاں عوام دے سامݨے سرخرو تھیسوں ۔ وزیراعظم سعودی عرب دے وزیراعظم و ولی عہد شہزادہ محمد بن سلمان دی طرفوں مضبوط پیغام ݙیوݨ سیف ڈیپازٹس 5 ارب ڈالر تئیں گھن ونڄݨ تے سرمایہ کاری 10ارب ڈالر تئیں ودھاوݨ دا عندیہ ݙیوݨ تے وی انہاں دا شکریہ ادا کیتے تے آکھیے جو پاکستان دے دوست ملکاں اساں کیتے اللہ تعالیٰ دے فضل و کرم نال ٻہوں وݙا وسیلہ بݨیے ، ہݨ ساݙی واری اے جو کم کرتے ݙکھاؤں ۔ انہاں ایں عزم دا اظہار کیتے جو اتحادی حکومت قوم کوں مایوس نہ کریسی ۔
