اسلام آباد۔5فروری(اے پی پی) صدر مملکت ڈاکٹر عارف علوی آکھیے اڄ اساں کشمیری عوام دے ناقابلِ تنسیخ حق خود ارادیت گھنݨ کیتے انہاں دی جائز ، منصفانہ جدوجہد کیتے پاکستان دی غیر متزلزل حمایت دے اظہاراچ یوم ِ یکجہتی کشمیر منیندے پیوں ۔ ایں موقع تے اساں بھارت دے غیر قانونی تسلط دے خلاف کشمیری بھراویں تے بھیݨاں دی ݙھاکیں تے پراݨی مزاحمت اچ بے لوث قربانیاں کوں زبردست خراج تحسین پیش کریندوں ،اساں اے ݙینھ عالمی برادری دی توجہ اقوام متحدہ دی سلامتی کونسل دی متعلقہ قرارداداں دے پاسے کراوݨ کیتے منیندوں جیں اچ آکھیا ڳیا ہئی جو جموں و کشمیر دے جھیڑے دا حتمی فیصلہ عوام دی مرضی دے مطابق اقوام ِمتحدہ دے زیر اہتمام آزادانہ اتے غیر جانبدارانہ استصوابِ رائے دے جمہوری طریقے نال کیتا ویسی ۔ یوم یکجہتی کشمیر دے حوالے نال ایوان صدر میڈیا ونگ تون جاری بیان اچ صدر مملکت ڈاکٹر عارف علوی آکھیے گزریل 75 سالاں توں بھارتی قابض افواج غیر قانونی طور تے بھارتی زیرِ تسلط جموں و کشمیر اچ دہشت گردی دا راج مسلط کیتا ہویا اے لوکاں کوں ݙراوݨ تے دباوݨ دی لامتناہی مہم شروع کر رکھی اے۔ انہاں آکھیے 9 لکھ توں ودھ بھارتی مسلح اہلکاراں دی موجودگی خطے کوں ھک کھلی جیل بݨا رکھیے ۔بھارت دےغیر قانونی زیر تسلط جموں و کشمیراچ 5 اگست 2019 دے غیر قانونی اتے یکطرفہ اقدامات بین الاقوامی قانون ، بشمول اقوام متحدہ دے چارٹر، چوتھے جنیوا کنونشن، اتے اقوام متحدہ دی سلامتی کونسل دی متعلقہ قرارداداں ، دی ھک کھلم کھلا خلاف ورزی ہن۔ صدر مملکت مزید آکھیے بھارت آبادیاتی ڈھانچے اچ مصنوعی تبدیلیاں، سیاسی انجینئرنگ، مقامی لوکاں دی معاشی پسماندگی اتے کشمیری شناخت اتے ثقافت تے حملیں دے ذریعے انہاں غیر قانونی اقدامات کوں مزید تقویت ݙیوݨ دی مسلسل کوششاں کریندا پئے ۔
