ملتان۔ 18 اگست (اے پی پی) چیئرمین سینٹ سید یوسف رضا گیلانی آکھیے عوام کوں ریلیف تے بنیادی سہولتاں ݙیوݨ سانڳے ہرممکن اقدامات چاتے ویندے پئن، میکوں امید اے وختی اساں ملک کوں بحراناں توں کڈھ تے ترقی دے رستے ٹور گھنسوں ، ساریاں سیاسی جماعتاں کوں ملکی ترقی و خوشحالی سانڳے آپݨا کردار نبھاوݨاں چاہیدے ۔ اے ڳالھ انہاں چنوں اچ نجی کالج دی سالانہ کانووکیشن تقریب اچ بطور مہمان خصوصی خطاب کریندے آکھی اے ۔ یوسف رضا گیلانی آکھیے ڈگریاں گھنݨ آلے طالب تے طالبات انھاں دے ما پیو تے استاداں کوں مبارخ ݙینداں ۔ خاص کر انھاں طالبیں تے طالبات کوں جنہاں آپݨی عمدہ کارکردگی نال تمغے ڳھدن ۔چیئرمین سینٹ یوسف رضا گیلانی آکھیے نینگر نسل آپݨی تعلیم و ہنر نال ملک و قوم سانڳے ماݨ دا بݨن، نینگر طبقہ کوں آپݨے خاندان نال ملکی معاشی ترقی دا لازمی جزو بݨݨا اے ،تعلیم یافتہ نینگر نسل آپݨی تعلیم نال معاشرے اچ چنڳی تبدیلی گھن آوݨی اے ،تعلیم یافتہ نینگراں آپݨے آپݨے شعبیں اچ نویں تحقیق تے ایجادات متعارف کراوݨیاں ہن تعلیم یافتہ نینگر نسل ملکی قدرتی وسائل تے تحقیق کر تے روزگار دے موقع پیدا کرݨے ہن ،ساݙے نینگر قابلیت و صلاحیت اچ کہیں توں گھٹ کائنی ، میاں چنوں توں تعلق رکھݨ آلے پاکستانی اتھلیٹ ارشد ندیم قومی ہیرو ہن،پیرس اولمپیکس اچ ملک سانڳے گولڈ میڈل جتݨ تےانھاں کوں خراج تحسین پیش کرینداں ۔اساں پاکستان بݨاوݨ آلیں اچوں ہیسے میݙے وݙیں بانی پاکستان قائداعظم اتے تحریک پاکستان نال گھاٹا تعلق ہئی ،جمہوریت دی بحالی سانڳے پاکستان پیپلزپارٹی وݙیاں قربانیاں ݙتن ،سابق وزیراعظم ذوالفقار علی بھٹو شہید دا 1973 دا آئین ݙیوݨ ٻہوں وݙا کارنامہ اے،اختلاف رائے جمہوریت دا حسن لیکن ملکی مفادات سانڳے ساریں کوں رل تے آپݨا کردار نبھاوݨا ہوسی ، ملکی ترقی و خوشحالی تے استحکام سانڳے آپݨا چنڳاں کردار ادا کریندا رہساں ۔یوسف رضا گیلانی آکھیے میاں چنوں اچ یونیورسٹی کیمپس بݨاوݨ سانڳے کوشش کریسوں ،جنوبی پنجاب اتھاں دی عوم دی پراݨی خواہش اے ،جنوبی پنجاب صوبہ ساݙی پارٹی دے منشور اچ شامل اے ،وختی یا دیر نال جنوبی پنجاب انڄ صوبہ بݨسی ۔ انھاں مزید آکھیے سارے سیاسی فریقین ملکی ترقی و خوشحالی سانڳے آپݨا کردار چنڳے طریقے نال نبھاون تاں ملک اچ ترقی تے خوشحالی نال استحکام آسی
