اسلام آباد۔6نومبر(اے پی پی):نگران وزیرِ اعظم انوار الحق کاکڑ آکھیے جو بنیادی صحت دیاں سہولتاں ہر پاکستانی دا حق اے، حکومت عام آدمی کوں ہر سوکھ ݙیسی۔ اے ڳالھ انہاں اسلام آباد اچ عالمی ادارہِ صحت دے پاکستان اچ نمائندے ڈاکٹر پلیتھا ماہی پالا نال الیندے آکھی۔ ملاقات اچ نگران وفاقی وزیرِ صحت ڈاکٹر ندیم جان اتے متعلقہ اعلی حکام وی موجود ہن۔ وزیرِ اعظم عالمی ادارہ صحت اتے ٻئے ساڄھے داراں دا پاکستان دے شعبہ صحت اچ اصلاحات کیتے تعاون تے شکریہ ادا کیتے اتے آکھیے جو عالمی ادارہ صحت دے ݙتے موبائل ہیلتھ کلینکس و ایمبو لینسز نال بنیادی صحت دی سہولیات عام آدمی تئیں پڄسن۔
نمائندے ݙسایا جو پاکستان اچ 464 بنیادی مراکز صحت دی اَپ گریڈیشن دے میگا پراجیکٹ تے ݙو مہینے اچ کم مکمل کر ڳھدا ویسی، موبائل ہیلتھ یونٹس ڈیجیٹل نظام دے تحت صحت دے مرکزی نظام نال جڑیے ہوسن ڄیڑھے مریض وݙے ہسپتالاں کوں وی ٻھیڄ سڳسن۔ بعد اچ وزیرِ اعظم عالمی ادارہ صحت اتے وزارتِ قومی صحت وچال لیٹر آف انڈر سٹینڈنگ تے وی دستخط دی تقریب اچ شرکت کیتی
وزیرِ اعظم ڈبلیو ایچ او ولوں ملݨ آلیاں 5 ایمبیولینساں، ہک موبائل کلینک اتے 2 ویکسی نیشن وینز وی ݙٹھن۔
