اسلام آباد۔3ستمبر(اے پی پی) وفاقی کابینہ پاکستان اتے 6 ملکاں دے تجارتی بلاک “مرکوسر” وچال تجارتی فریم ورک معاہدے تے دستخط دی توثیق کرݙتی اے۔ وفاقی کابینہ دا اجلاس اسلام آباد اچ وزیر اعظم شبہاز شریف دی اڳواݨی اچ تھئے۔ اجلاس اچ وفاقی وزیر صنعت و پیداوار اتے قومی غذائی تحفظ رانا تنویر حسین دے ٻھرا اتے رکن صوبائی اسمبلی مرحوم رانا افضال حسین کیتے فاتحہ پڑھی ڳئی۔ وزیر اعظم اجلاس اچ مہانگ دی شرح ڳھٹݨ تے اطمینان کریندے آکھیے جو اے ملک اتے قوم کیتے ٻہوں حوصلہ افزا اے۔ وفاقی کابینہ وزارت تجارت دی سفارش تے ” مرکوسر ” ڄیڑھا جنوبی امریکہ اچ موجود ملک ڄیویں برازیل، ارجنٹینا، یوروگوائے اتے پیراگوئے دا ہک تجارتی بلاک اے، ڄیکوں عام زبان اچ سدرن کامن مارکیٹ وی آکھیا ویندے اتے اسلامی جمہوریہ پاکستان وچال تجارتی فریم ورک معاہدے تے بعد از وقوع/ دستخط دی منظوری ݙتی اتے معاہدے دی توثیق وی کیتی۔ وزیراعظم آکھیے جو جنوبی امریکہ دی مارکیٹ پاکستانی مصنوعات کیتے چنڳی ثابت تھی سڳدی اے۔ وزیراعظم ہدایت کیتی جو معیشت بارے سارے معاہدے اتے مفاہمتی یادداشتاں جیندے تے ہݨ تئین کم نئیں تھی سڳیا انہاں تے تیکھے عمل کیتا ونڄے۔ کابینہ وزارت خارجہ امور دی سفارش تے البانیہ دی وزارت برائے یورپ اتے خارجہ امور اتے اسلامی جمہوریہ پاکستان دی وزارت خارجہ وچال ݙوطرفہ سیاسی مشاورت بارے مفاہمتی یادداشت تے دستخط کرݨ دی منظوری ݙتی۔ کابینہ وزارت خارجہ امور دی سفارش تے’’کانفرنس آن انٹریکشن اینڈ کانفیڈینس بلڈنگ میژرز ان ایشیاء2010 ” دے سیکرٹریٹ، ایندے عملے اتے رکن ملکاں دے نمائندیاں دے استحقاق اتے استثنیٰ دے کنونشن دی توثیق دی منظوری ݙتی۔ کابینہ وزارت وفاقی تعلیم و پیشہ وارانہ تربیت دے سینئر جوائنٹ سیکرٹری سید جنید اخلاق دی بطور چیئرمین فیڈرل بورڈ آف انٹرمیڈیٹ اینڈ سیکنڈری ایجوکیشن اچ تعیناتی دی مدت اچ ریگولر افسر لاوݨ تئیں توسیع دی منظوری ݙتی۔ وفاقی کابینہ مذہبی رواداری اتے بین المذاہب ہم آہنگی پالیسی دے مسودیاں بارے ہک کمیٹی ٻݨاوݨ دی وی منظوری ݙیندے ہوئے کابینہ کمیٹی برائے لیجسلیٹو کیسز دے 26 اگست 2024 دے اجلاس اچ کیتے ڳئے فیصلاں دی وی توثیق کیتی۔
