اسلام آباد۔6اکتوبر (اے پی پی) وفاقی وزیر منصوبہ بندی و ترقی پروفیسر احسن اقبال آکھیے جو پوری دنیا بحرانی کیفیت توں گزردی پئی اے ،کووڈ دے معاشی بحران دے صدمے توں دنیا حالی تئیں نکل نی سڳی ، پاکستان ایں ماحولیاتی تبدیلی دا شکار تھئے جیں کوں ترقی یافتہ ملکاں حالی تئیں افسانہ سمجھدے ہن ،سیلاب پاکستان دے انہاں علاقیں کوں متاثر کیتےجیڑھے جو پہلے پہلے ہی پسماندہ ہن۔ اے ڳالھ انہاں خمیس کوں اتھاں بین الاقوامی ترقی اتے سکیورٹی دے اقدامات دے حوالے نال منعقدہ کانفرنس توں خطاب کریندے ہوئیں آکھی اے ۔ انہاں آکھیے جو پوری دنیا ھک عالمی بحران دا شکار اے، کووڈ دے معاشی بحران دے شاک توں دنیا حالی نکلی کوئناں ہئی جو عین ایں ویلھے یوکرین دے بحران پوری دنیا کوں آپݨی وکیڑا چ گھن ڳھدا تے ایں دی وجہ توں پوری دنیا اچ کھاوݨ پیوݨ دیاں قیمتاں اچ ریکارڈ ودھارا تھئے تے انہاں ملکاں وی مہانگ ݙٹھی جتھاں مہانگ دا تصور وی کائناں ہئی ،انہاں آکھیے جوپاکستان اچ سی پیک دے ذریعے29ارب ڈلر دی سرمایہ کاری آئی تے بدقسمتی توں اساں سی پیک توں ملݨ آلے ترقی دے عمل دی رفتار کوں برقرار نی رکھ سڳیے ، پاکستان ایں موسمیاتی تبدیلی دا شکار تھئے جیں کوں ترقی یافتہ ملک حالی تئیں افسانہ سمجھدے ہن ۔ انہاں آکھیے جو اساکوں آوݨ آلیاں نسلاں کوں ایجھا پاکستان ݙیوݨا اے جیڑھا 2047اچ صف اول دی معیشت ہووے ،ترقی دا عمل استحکام تے یکجہتی نال جڑیا ہووے ۔ افکار کوں عمل اچ تبدیل کرݨ دی لوڑھ اے۔
