اسلام آباد -26 آڪٽوبر (اي پي پي)ناڻي ۽ محصول واري وفاقي وزير سينيٽر محمد اورنگزيب ايس اينڊ پي گلوبل جي نمائندن سان ملاقات ڪئي آهي. هن ايس اينڊ پي گلوبل جي وفد کي ميڪرو اڪنامڪ استحڪام، مالياتي استحڪام جي قدمن ۽ پرڏيهي کاتن جي صورتحال کان آگاهه ڪيو ۽ ٻڌايو ته معيشت جي اهڃاڻ مجموعي طور تي هاڪاري رجحان جي عڪاسي ڪن ٿا. هن ٻڌايو ته حڪومت جا خرچ گهٽجي رهيا آهن جنهن جي ڪري قرضن جي خدمت جي لاڳت ۾ گهٽتائي آئي آهي. هن ان اميد جو اظهار به ڪيو ته ايس اينڊ پي گلوبل پاڪستان جي ريٽنگ کي جلد ئي اپ گريڊ ڪندي. ناڻي واري وزارت طرفان جاري پريس رليز مطابق ناڻي واري وزير آمريڪا جي توانائي وسيلن بابت اسسٽنٽ سيڪريٽري آف اسٽيٽ جيفري پياٽ سان به ملاقات ڪئي. ناڻي واري وزير کيس توانائي جي شعبي کي درپيش مسئلن کان آگاهه ڪيو ۽ حڪومت طرفان متعارف ڪرايل سڌارن جي تفصيلن تي روشني وڌي. هن امريڪي حڪومت سان تجديد جوڳي توانائي تي منتقلي جي حوالي سان پاڪستان سان سهڪار جي آڇ تي ٿورو مڃيو. ناڻي واري وزير هڪ اعليٰ سطحي تقريب ۾ عالمي بئنڪ جي انتظام هيٺ منعقد گروئنگ اسٽرانگر: ارجنٽ ڪال ٽو امپورو چائلڊ نيوٽريشن جي موضوع تي منعقد بحث ۾ به شرڪت ڪئي. ان موقعي تي ناڻي واري وزير پاڪستان ۽ خاص طور تي ٻهراڙي وارن علائقن ۾ ٻارن کي درپيش غذائي کوٽ جي صورتحال تي روشني وڌي. هن ٻارن ۾ غذائي کوٽ سبب واڌ ويجهه جي مسئلن جي خاتمي لاءِ گهڻ شعبي جاتي ۽ حڪومت جي نقطي نظر تي زور ڀريو. هن ٽيڪس جي شعبي ۾ سڌارن ۽ توانائي سيڪٽر جي سبسڊيز تي گهٽتائي جي ضرورت تي به زور ڀريو. هن حڪومتي ملڪيتي ادارن (ايس او ايز) جي انتظام ۾ بهتري، موسمياتي تبديلي، آبادي ۾ اضافي تي ضابطو آڻڻ ۽ ٻارن جي واڌ ويجهه جي حوالي سان سيڙپڪاري لاءِ وڌيڪ مالي گنجائش پيدا ڪرڻ تي عالمي برداري جو ٿورو مڃيو. هن چيو ته ورلڊ بئنڪ جي ٻارن ۾ غذائي کوٽ ۽ واڌ ويجهه جي مسئلن تي سيڙپڪاري جي حوالي سان پاڪستان سان ڪنٽري پارٽنرشپ فريم ورڪ تحت سيڙپڪاري پاڪستان جي مستقبل ۾ سيڙپڪاري جي برابر آهي. ڊجيٽل ڪو آپريشن آرگنائيزيشن (ڊي سي او) جي سيڪريٽري جنرل ديمه ال يحييٰ سان ملاقات دوران ناڻي واري وزير پاڪستان ۾ آءِ سي ٽي جي شعبي ۾ موجود بي پناهه صلاحيتن کي اجاگر ڪيو. هن چيو ته حڪومت گورننس جي بهتري، شهرين جي زندگي جي معيار ۾ اضافي ۽ اقتصادي فلاح و بهبود لاءِ ڊجيٽل ايڪو سسٽم تي سيڙپڪاري ڪري رهي آهي. هن ڊجيٽل انفراسٽرڪچر، ڊجيٽل اڪانومي، ڊجيٽل ايف ڊي آءِ، ڊجيٽل اسڪلز ۽ ڊجيٽل گورننس ۾ ويجهي سهڪار تي به زور ڀريو. دبئي اسلامڪ بئنڪ جي سي اي او ڊاڪٽر عدنان چلوان سان ملاقات دوران ناڻي واري وزير فنانسنگ جي فرق کي پورو ڪرڻ ۾ بئنڪ جي وقت سر سهڪار تي ٿورو مڃيو ۽ ان ڳالهه کي ساراهيو ته دبئي اسلامڪ بئنڪ پاڪستان ۾ پنهنجي آپريشنز کي هٿي ڏئي رهي آهي. ناڻي ۽ محصول واري وفاقي وزير محمد اورنگزيب دبئي اسلامي بئنڪ جي گروپ سي اي او ڊاڪٽر عدنان چلوان سان به ملاقات ڪئي ۽ پاڪستان جي مالي ضرورتن کي پورو ڪرڻ ۾ وقت سر مدد فراهم ڪرڻ تي بئنڪ جو ٿورو مڃيو ۽ پاڪستان ۾ بئنڪ جي آپريشنز ۾ توسيع جي عزم کي ساراهيو، هن چيو ته تازن ڏينهن ۾ فچ ۽ موڊيز پاڪستان جي ڪريڊٽ ريٽنگ ۾ بهتري ڪئي آهي. هن عالمي مالياتي مارڪيٽن ۾ پهچ لاءِ بانڊز ذريعي فنڊنگ جي واڌ ويجهه جي عزم جو به اظهار ڪيو. ناڻي واري وزير پاڪستان جي ڪريڊٽ ريٽنگ کي تازو ئي سي اي اي 2 تائين اپگريڊ ڪرڻ تي موڊيز جو ٿورو مڃيو. هن آگاهه ڪيو. ناڻي واري وزارت ۽ مرڪزي بئنڪ جي سينئر قيادت باقاعدگي سان ريٽنگ ايجنسين سان رابطي ۾ رهي ٿي، ملاقات ۾ قرضن جي پائيداري، مالياتي پاليسي، پرڏيهي ڪمزورين کي منهن ڏيڻ، مٽاسٽا جي ذخيرن، مالياتي نظم و ضبط، محصول جي صورتحال، حڪومتي صلاحيت ۽ مالياتي مارڪيٽن جي مضبوطي تي تفصيلي بريفنگ ڏني وئي.ناڻي واري وزير جي ٻين مصروفيتن ۾ ورلڊ بئنڪ ۽ آءِ ايم ايف جي ساليانا پلينري ميٽنگز ۾ شرڪت، چائنيز گلوبل ٽيليويزن نيٽ ورڪ (سي جي ٽي اين) کي تفصيلي انٽرويو به ڏنو. ورلڊ بئنڪ ۽ آءِ ايم ايف جي ايگزيڪيوٽو ڊائريڪٽر طرفان گڏيل آجياڻي ۾ به شرڪت ڪئي.
