اسلام آباد۔12مئی(اے پی پی)ترجمان دفتر خارجہ عاصم افتخار آکھیے جو بھارت نال مذاکرات تھی سڳدن، بھارت نال تجارتی پالیسی اچ کوئی تبدیلی نئیں آئی۔ ہفتہ وار بریفنگ اچ ترجمان آکھیے جو پاکستان مذاکرات دے در کݙاھیں وی بند نئیں کیتے، بھارت سودھا سارے ہمسایہ ملکاں نال سنڳت چاہندوں، مقبوضہ کشمیر اچ بھارتی اقدامات پاروں مذاکرات بند تھین، جیکر بھارت مناسب ماحول ݙیوے تاں مذاکرات تھی سڳدن، بھارت نال تجارت سانڳے وزارت تجارت وضاحت جاری کرݙتی اے اتے ساݙی تجارتی پالیسی اچ کوئی تبدیلی نئیں آئی، پاکستان بھارت اچ شنگھائی تعاون تنظیم کمیٹی دے اجلاس اچ شرکت کریسی اتے ایس سی او انسداد دہشتگردی و انتہا پسندی ماہرین کمیٹی دا اجلاس 16 مئی کوں دہلی اچ تھیسی۔ انہاں آکھیا جو افغانستان نال تعلقات معمول دے مطابق ہین، پاکستان افغانستان تے زور ݙتے جو اوندی سرزمین ساݙے خلاف استعمال تھیوݨی چاہیدی، کالعدم ٹی ٹی پی سودھا سارے دہشت گرد گروہاں دے خلاف کاروائی تھیوݨی چاہیدی اے اتے اے معاملہ نویں افغان حکومت نال چاتے۔
