اسلام آباد۔13جولائی (اے پی پی):وزیرمملکت اطلاعات و نشریات فرخ حبیب آکھیے جو الیکشن کمیشن اچ فارن فنڈنگ کیس اچ ن لیگ اتے مسلم لیگ ن دے اکائونٹس دی فنانشل ایکسپرٹس اتے چارٹر اکائونٹنٹ دے ذریعے جانچ پڑتال دی نویں درخواست دائر کرݙتی اے ،سٹیٹ بینک آف پاکستان ولوں جمع کرائے ڳے ریکارڈ موجب ن لیگ دے 12اتے پیپلز پارٹی دے 7اکائونٹس دا گوشواریں اچ ذکر کائنی ،کہیں اے اکائونٹس منی لانڈرنگ ،فالودے آلے اتے پاپڑے آلے اکائونٹس وانڳوں کمیشن اتے منی لانڈرنگ کیتے استعمال تاں نی تھئے ، بے نظیر بھٹو اپݨی کتاب اچ لکھیے جو میݙی حکومت کوں ڈھاوݨ کیتے نواز شریف اسامہ بن لادن توں پیسے ڳھدے ،پیپلز پارٹی مارک سہگل کوں کیڑھی مد اچ ادائیگیاں کریندی رہی ، یوم شہدا کشمیر تے جاناں دے نذرانے پیش کرݨ آلے کشمیریاں کوں سلام پیش کریندوں ،مودی کوں خوش کرݨ کیتے آپݨیاں شادیاں تے سݙݨ آلے کݙاہیں ایں توں سوال کیتے جو او مظلوم کشمیریاں تے کیوں ظلم کریندے پئے،کڄھ بہروپئے کشمیر دے دورے تے ہن جنہاں دا کشمیر کاز نال کوئی تعلق کائنی،او دراصل کشمیر کاز کوں ضیان پڄیندے پئن ،اکبر ایس بابر ایزی دی اڳلی قسط کیتے آپوں گھڑی فائنڈنگ رپورٹ دا شوشا چھوڑیندے پئن ۔او منگل کوں الیکشن کمیشن اچ مسلم لیگ ن اتے پیپلز پارٹی دی فارن فنڈنگ متعلق اپݨی درخواست دی سماعت دے بعد میڈیا نال ڳال مہاڑ کریندے پئے ہن ۔وزیر مملکت اطلاعات و نشریات فرخ حبیب آکھیے جو مسلم لیگ ن اتے پپیلز پارٹی دی فارن فنڈنگ دے حوالے نال سکروٹنی کمیٹی اچ اساݙی درخواست زیر سماعت اے ، اساں ھک نویں درخواست دائر کیتی اے جیں اچ مسلم لیگ ن اتے پیپلز پارٹی ولوں فارن فنڈنگ دے حوالے نال جمع کرائے ڳے ریکارڈ تئیں رسائی باالخصوص چارٹرڈ اکائونٹٹ اتے فنانشنل ایکسپرٹس توں جانچ پڑتال دی استدعا کیتی ڳئی اے کیوں جو الیکشن کمیشن اے سہولت پی ٹی آئی دے فارن فنڈنگ کیس اچ وی ݙتی اے ایہا سہولت اساں وی منگی اے۔
